(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
كان “نوح” يجلس لجواره، و”تالا” تعد لأخيها كوبا من المياه، أحضرته واتجهت إليه، ولكنها تجمدت فور أن استمعت له يقول:
_رحيق مختفية من القصر من كام يوم، الحقير ده أكيد آذاها!
سقط الكوب من يدها أرضًا، فاسترعت انتباه الجميع، كان “نوح” أول من هرول لها، يعاونها في لم الزجاج ويهدئ من روعها، في حين أن كسب “كنان” اهتمام “تيام” له عسى ألا يشك في شقيقته:
_هيعمل فيها إيه يعني! هي بتفضل في الجناح بالكام شهر محدش بيشوفها اصلا!
رد عليه بغضب حارق:
_مش في جناحه.
اندهش “كِنان” مما قال، وسأله بشكٍ:
_إنت دخلت جناح هارون يا تيام؟؟
تابع “نوح” و”تالا” الحوار بينهما بقلق وارتباك، فإذا به يجيب:
_أيوه دخلت جناح القذر ده وشكوكي زادت ناحيته، رحيق بالفترة الأخيرة كانت بتحاول تحكيلي حاجة، بس أنا من غبائي وغيرتي مكنتش مديها أي فرصة، اختفائها ده بيأكدلي إن في حاجة غلط وأنا لازم أعرفها، ومش هسكت الا لما ألقيها سامـــــع!!
زاد الرعب جليًا في أعين الجميع، فاذا ب”كنان” يقطع الصمت بسؤاله:
_إنت منستهاش يا تيام؟
منحه ابتسامة ساخرة، قبل أن يجيبه:
_هو أنا كنت نسيتها قبل كده عشان أنساها دلوقتي!
تيقن “كنان” بأنه لن يتراجع حتى يستخرج ما دفن بالماضي، نبشه فيما مضى سيجعل نهاية “هارون” وشيكة، والمخيف بالأمر أنه ليس بالهين، فلن تكون نهايته سهلة المنال، مؤكدًا بأنه سيعيث بأعماله الماكرة ليتمكن من النيل من كليهما.
استقام “كنان” بوقفته وهو يشير لهم:
_اقفل الموضوع ده دلوقتي، وقوم ارتاح شوية قبل الفرح، لازم نفكر إزاي هنبعد نوح وتالا عن عيون هارون اللي شكله بيراقبنا وعارف اللي ناويين عليه.
لحق به “تيام” وقد حاوط كتف شقيقته، ومضى برفقتها لغرفتهما، بينما رنا “نوح” من أخيه وقال:
_هيعمل إيه لو إتأكد أن هارون فعلا أذى رحيق وأنه ممكن يكون ق*تلها أصلًا؟؟
استدار له “كِنان” وهو يشير له:
_وطي صوتك يا نوح، تيام مش لازم يعرف اللي حصل سامع، نبه على تالا متجبلوش سيرة بأي حاجة لحد ما أشوف هحلها ازاي دي!
وربت على كتفه يطالبه:
_يلا يا حبيبي ادخل نام انت، وراك فرح الصبح وليلة بطولها يا عريس.
عدل نظارته الطبية بإصبعه وهو يجاريه بنظرة غاضبة:
_إنت ليك في الكلام الفاسق ده يا كيوي، بترميلي ايحاءات مش لذيذة ولا لايقة عليك أصلًا.
