(أشباح المخابرات2) من الفصل الحادي والعشرون الى الخامس والعشرون

غفت على ساقه برأسها، وإصابتها نصب عينيه مما زاد من وجعه، فإذا بها تخبره وهي تجاهد تأثير الأدوية:
_أنا عايزة بابي يكون جانبي، وده صعب فإنت البديل يا شبح.

ضحك بنزق على حديثها، ومال يبعد خصلاتها خلف أذنيها بينما يخبرها بصوتٍ منخفض:
_والواد اللي هيموت من القلق عليكِ بره ده وضعه معاكِ إيه؟ إتقي الله فيا وفيه! هتموتينا واحنا في عز شبابنا يا بومة!!!!

ابتسمت على حديثه ورددت بصوتٍ دافئ مطموس بالمشاعر، كأنها تسأله عمن يقصد:
_ياسيـن!!

زوى حاجبيه ساخطًا وهو يهزها برفق:
_الأدوية أثرت عليكِ ولا إيه، كويس إنه خرج لتعترفيله بحبك وإنتِ متدهولة كده، أنا من شوية رميتله نظرة خليته ساب الأوضة وجري قبل ما يق*تلني، فإيه رأيك أستغلك وإنتِ بالوضع ده وأضربلكم ورقتين عرفي، عشان بس أعيش مرتاح الضمير.

رفعت رأسها إليه ومنحته نظرة غاضبة، ثم قالت قبل أن تفقد وعيها مجددًا وقد نجحت بتسديد هدفها على من كان على وشك الدخول إلى الغرفة:
_أنا وياسين هنتجوز رسمي وقصاد الدنيا كلها، وهبقى أخلي أولادك إنت ومارال يمسكولنا الشموع.

مال “ياسين” على باب الغرفة من الخارج وهو يتنهد في تعب، وابتسامته الساخرة تزين وجهه، بينما صاح فيها “زين” بصدمة:
_يخربيت سنينك، إنتِ ناوية تخللي الواد جانبك لحد ما أتجوز وأخلف عيال كمان، يعني مش ماشي معاكِ عيل واحد!!!

رددت وهي تغفو ببطء:
_لا ولد واحد مش كفايا يا زين.

هز رأسه بيأس، وهدر:
_هتعنسي إنتِ والواد اللي حيلتي يا بايرة.

ربت على خصلاتها وهو يبتسم على حديثها، ثم ناداها مجددًا وهو يسألها:
_مش هتحكيلي حصل معاكِ إيه؟

سحبت الغطاء من فوقها بانزعاجٍ وأنهت حديثها:
_إسأل القائد.

عند هذا الحد عاد “ياسين” للمطبخ، يستكمل صنع حساء الخضروات الذي كان يصنعه لها، ومازال يبتسم من الحين والآخر حينما يتذكر حديثها مع “زين”.

تنهد فجأة وتمتم بضجر:
_لسه هستنى لما يتجوز ويخلف أكتر من مرة، إيه الشروط التعجيزية دي!!!
*****

لم يكن ينقصه في هذا اليوم العصيب، إلا مواجهته، استدار” هارون” للخلف وهو يزفر بضيق شديد، فوجد “تيام” يقابله بنظراتٍ حادة، تملؤها الشكوك حيال أمرها:
_أفندم، بتسأل عن مراتي بصفتك إيه؟

واجهه “تيام” بانفعالٍ شرس:
_متكدبش الكدبة وتعيش الدور يا هارون، رحيق فين؟؟