(أشباح المخابرات2) من الفصل الحادي والعشرون الى الخامس والعشرون

أعد “كِنان” كأسين ووضع فيهما مشروبًا، ثم إتجه إليه يقدمه له، وزع “زين” نظرة خاطفة صوبه وصوب ما يحمله، ثم ردد بسخرية:
_بعد إذن عالمك القذر ده أنا ماليش في الشرب.

وتابع وهو يستريح بجلسته:
_ لإني لو سكرت مش هعرف أكيد أأدي مهمتي اللي جايبني عشانها، إسكر إنت وأنا موجود عشان أحميك، لكن أنا وإنت لو سكرنا مش هيكون لينا وجود تاني غير في صفحة الحوادث ده لو مكنش الأعلى منك تاوى جتتك وجتتي.

عاد الضحك يسيطر على “كِنان”، وقد أشار له مجددًا:
_متقلقش أنا كمان ماليش في الشرب.

التقط “زين” منه ما قدمه له، وقربه من شفتيه كأنه يدعي ارتشافه، بينما يستشف بحاسة الشم لديه إن وُضع فيه شيء أم لا، وحينما شك أنه نظيف بدأ بالشرب وهو يثق بمهارات قادته الذين أشرفوا على تدريبه بأنه من المحال أن ينخضع خلف أي مشروب يحوي على كحول.

جلس “كِنان” أمامه، وبدأ بشرب مشروبه، ثم قال:
_أنا جبتك عشان أبلغك إني رجعت لشغلي الأساسي، فالخطر المرادي هيكون مضاعف، لإنه مش هيكون من بره، الخطر قريب مني وجوه بيتي.

منحه “زين” نظرة ثاقبة، فوضع الكأس وتساءل:
_وإيه شغلك الأساسي غير الكيف والأسلحة؟

سحب رشفة من كأسه وردد:
_ شيء أخطر من كده.

لوى شفتيه بتهكمٍ:
_هو لسه في شيء أخطر من القذارة دي؟

اتسعت ابتسامة “كِنان” على حسه الفكاهي في تلك الظروف العصيبة، وهز رأسه بتأكيد، ثم أنهى النقاش قبل البدأ به:
_كل حاجة هتعرفها في وقتها يا سلطان، إنت سبق وعديت أكتر من اختبار، وده بيأهلك معانا لجولات تانية أخطر، وطبعًا كل ليڤل هتعلى فيه هيكون بحساب أعلى بكتير من اللي قبله.

سحب “زين” رشفة طويلة من الكأس، ومال برأسه إليه، ليسدد سؤالًا مباشرا:
_الخطر اللي بتتكلم عنه ده إنت بتتعامل معاه من فترة طويلة، فلو كان غرضه ق*تلك كان حصل من زمان، أعتقد في حسابات تانية للشخص اللي عايزني أحميك منه.

ترك “كِنان” كأسه والصدمة تتوغل على معالمه:
_قصدك إيه؟

ارتسمت بسمة خبيثة على وجه “زين”، وأشار ساخرًا:
_ضلفة الدولاب اللي ممشيها وراك في كل حتة، بتهوي عليك للشخص اللي بالك فيه.

توسعت عينيه في صدمة حقيقية، وراح يهمس بعدم تصديق:
_حيدر!!

صمته كان إجابة صريحة له، بينما يردد “كِنان”:
_ لا مستحيل يخوني،حيدر معايا من سنين طويلة، إنت آ…