(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
وربت على كتفه بقوةٍ:
_احنا سابقين الكلاب دول بألف خطوة، خليك واثق إننا في ضهركم.
ابتسم “ياسين” وقال بثقة:
_أكيد يا باشا، بس يا ريت حضرتك إنت والقائد تشتغلوا بسرعة على العقار اللي بعت لحضرتك تقرير عنه، محتاج دراسة كاملة عنه، لأننا مش عارفين بنتعامل مع إيه بالظبط؟
هز رأسه بتأكيد، وبرازنة قال:
_هيوصلك بأقرب وقت.
واضاف “مراد” وهو يحذره:
_المهم تأخد بالك كويس من خطواتك، وبالأخص زين، كِنان على وشك إنه يسحبه للعالم السفلي اللي محدش عنده علم عنه أبدًا، رحيم حط زين في طريق كِنان لأنه الوحيد اللي بيمتلك سرعة ومهاراة تهيئه يتعامل مع شخص زي كِنان .
أشار برأسه بتأكيدٍ، وقال:
_في رمز شوفته على الأسلحة اللي صنعها عثمان (A_o)، أنا حاسس إن الرمز ده بداية مصايب هتتخطى أي توقعات حاطينها ليهم.
راقبه “مراد” بنظرة ثابتة وملامح قوية تنم عن قوة شخصيته:
_ولو صح إنتوا مش أي حد يا ياسين.
ومال تجاهه يهمس له بابتسامة خبيثة:
_فاكر أول مهمة طلعتها إنت ومرين وزين كان عندكم كام سنة؟
تسرب له ذكريات تلك المهمة التي جعلت القادة والجهاز عاجزين عما فعله هؤلاء، ولولا أن شيع أن “الجوكر” و”الأسطورة” و”الوحش” هم من قاموا بها ما كان أحدا ليصدق ذلك.
ارتسمت ابتسامة واسعة على وجه “ياسين”، وخاصة حينما غمز له “مراد”:
_ق*تلتوا الأمير وزعمائه من قبل وصولنا لإنقاذكم!!
تبسم “ياسين” وهز رأسه ينفي ذلك:
_مفيش أطفال تعرف تعمل كده يا باشا.
ضحك “مراد” بصوت مسموع، وقال بصوته الرجولي:
_هصدقك وهكدب عنيا، ده يمكن المشهد اللي شوفناه أنا وعدي هو السبب اللي خلاه رفع إيده عنك، لأنه صدق إنك مش طفل عادي!
صحح له ساخرًا:
_لا يا باشا ده كان بداية كشف تدريباتي السرية وتغطية الدنجوان عليا طول السنين دي .
هز رأسه وهو يشير له:
_ دي حقيقة فعلًا.
(فيما يخص المهمة وكلام ياسين عن أول اصابة أخدها لحماية مرين، كل ده مرتبط بالمفاجأة اللي هتنزل يوم الاتنين الساعة 10، ومعاها مفاجأة تانية فكونوا بالقرب عشان مفاجأتنا مستحيل تنتهي 🫢)
تفحص “مراد” ساعته وهو يتفقد الوقت:
_لازم تخرج من المكان ده قبل الصبح.
وأضاف وهو يستعد للمغادرة:
_ومتقلقش اللي يخصك تحت حماية خاصة مننا.
قالها “الجوكر” واختفى من أمام آعين “ياسين”، خلف الظلام الكحيل الذي يغطي المساحة الشاسعة من حوله، بينما تحرك هو على الفور بعدما ارتدى لثامه مرة أخرى.
