(أشباح المخابرات2) من الفصل الحادي والعشرون الى الخامس والعشرون
بقلم أية محمد رفعت
وأضافت وهي تتطلع له بحزنٍ شديد:
_كنت معايا فلازم تكون فاهم البنات دول بيعانوا ازاي، الملفات اللي كانت على تليفون الكلب ده أكدتلي إن ليهم يد في قذارة مش مكشوفة لينا، قذارة ليها علاقة بالـ. ـدرك ويب، والديـب ويب، إنت مستوعب مدى قذارتهم!
تذكر “ياسين” ما قصته له “صوفي” عن ابنتها، ثم عاد للواقع وهو يهتف لها بلين:
_هننتقم منهم كلهم بس واحنا مع بعض!
أزاحت خصلاتها للخلف بعصبية، واستدارت تلتقط نفسًا طويلًا، ثم عادت تتطلع له وهي تخبره:
_إنت عامل بالظبط زي الأم اللي بلدها بتغتصـ.ــــب وبتدعي ليل نهار إن ربنا يحررها، مع ان جنبها جيش من الأولاد اللي يقدروا يخرجوا ويعملوا ده، خوفها الغريزي مش مخليها تفهم إن الدعوات لوحدها مش كفايا، خروج اولادها هيحميها قبل ما يحمي بلدها، حتى لو وقع منهم واحد ولا اتنين، الحرية من أي آسر ليها تمن.
صرخ فيها بعنف قاتل وهو يلكم الحائط من جوارها:
_مش هتكوني التمن لده سامعة، قدس في أمان لأنها برة اللعبة، إنتِ داخلاها وش، وأنا مش هسمحلك بده.
وراح يذكرها بامتيازاته:
_أوعي تنسي ان القرار هنا راجع ليا ولوحدي، وأقدر ببساطة أخليكِ تنسحبي من المهمة كلها.
قابلته بنظرة متعصبة، في حين أن ظهر “زين” أمامهما وهو يهتف بضيق:
_أنا زهقت منكم إنتوا الاتنين، وبتمنى إن الق*تل يكون حلال ليوم واحد بس أخلص منكم وأرتاح لباقي حياتي.
تغاضى “ياسين” عما يقوله، واستكمل وهو يشير لها:
_خروج من هنا انسي، مقابلة الشيطان ده مستحيل، كلام كتير هأمرك بالانسحاب وبنفسي هخدك للجوكر.
ومنح “زين” نظرة أخيرة قبل مغادرته للمنزل:
_عقل أختك.
تنهد بضجر وهو يطالعه يغادر المنزل:
_هعقلها وأعقلك قبل منها حاضر.
واستدار يمنحها نظرة ساخطة، ثم مال على الدرج وهو يميل بساقيه مُتسائلًا بنزقٍ:
_هببتي إيه المرادي يا بايرة؟ مش قولتلك متشديش قصاد الواد عصبيته قاتلة، هترتاحي لما يخلص عليكِ يا بومة!!
وأضاف وهو يتطلع للسماء ويشكو حاله:
_أنا مبقتش عارف أنا بحارب في أنهي جهة، أبويا اللي بيعقد الدنيا في وشي وعايزني سوبر مان، ولا عمي اللي بيديني كل النصايح عشان أكون جنتل مان، ولا شياطين عيلة التميمي اللي عايزة عقل مصحصح وفايق لغدرهم، ولا قصاد الجارحي والبايرة اللي ملهاش كاسر ولا بتاخدلها أي سواتر، حسبي الله ونعم الوكيل فيكم كلكم.
