(أشباح المخابرات1)من الفصل السادس عشر الى العشرين
بقلم أية محمد رفعت
ولج “ياسين” للداخل يراقبها بنظرة خبيثة، دخل إلى المطبخ حينما وجدها تجلس على مقعد الرخامة، يتصنع انشغاله بصنع كوب من القهوة، وهو يقول دون النظر لها:
_زين فين؟
أجابته ومازالت تمثل انشغالها بالحاسوب:
_خرج من ساعتين ولسه مرجعش.
قال وهو يرنو لمكينة القهوة:
_تحبي أعملك معايا قهوة؟
رفعت عينيها له تتطلع له بغيظٍ من بروده، وكأنه لم يتشاجر معها قبل مغادرته، وتنسى سريعًا ما قاله لها.
_أخدتي كام صورة؟
قالها “ياسين” وهو يغمز لها، فعادت تتطلع إلى الحاسوب وهي تتجاهله تمامًا، بينما تزداد بسمته خبثًا، وقف ينتظر نضوج القهوة وهو يصفر باستمتاعٍ، جعلها تصيح بانفعالٍ:
_في ناس بتحاول تشتغل هنا؟
حمل كوب قهوته، واتجه يجلس قبالتها ببرود:
_والناس دول مش ليهم أوضة خاصة بيهم؟
أجابته وهي تهتف بنزق:
_والله براحتهم يقعدوا مكان ما يحبوا، المكان مش بتاعك لوحدك يعني!
هز رأسه بتأكيدٍ، ورفع كوب قهوته يرتشفها وهو يراقب أصابعها:
_أمال فين خاتمك؟ قلعتيه كده من أول يوم، كده فال مش لطيف على فكرة.
تعمد إغاظتها وقد تجسد الغيظ والحنق بأكمله على وجهها، وخاصة حينما تابع:
_ويا ترى بقى هارون اداكِ الخاتم إزاي، بطريقة جديدة ومختلفة ولا التقليدية اللي بيعملها نص الشباب، انحنى وقدملك الخاتم؟
لوت شفتيها بتهكمٍ قبل أن تجيبه:
_وده هيفرق معاك في إيه؟
منحها ابتسامة باردة، ثم سحب رشفة طويلة من كوبه قبل أن يقول:
_فضول مش أكتر.
استغلت ما قال حينما سألته:
_إنت عملت إيه في يومك من باب نفس الفضول؟
أجابها وهو يتفحصها بنظرة ماكرة:
_ولا حاجه، وقفت بالمطعم شوية عشان أقنع تيام إني قبلت بالشغل، وبعد كده عديت على شقتي.
ما أن قال آخر كلماته حتى أبعدت زُرقتها عن شاشة الحاسوب، وتساءلت باهتمامٍ ملحوظ:
_روحت الشقة ليه؟
سدد لها نظرة عميقة، جعلتها تعيد خصلاتها البنية للخلف وهي تُهدئُ من لهفة حديثها:
_هما رجالة هارون لسه مراقبينك؟
شرب جرعة من قهوته الساخنة، وقال بنبرة حويطة:
_آيوه، وكمان صوفي عينيها عليا بالفترة الاخيرة.
وأضاف بتلاعبٍ:
_تصوري إنها بتألف عليا حوار مش عارف إذا كان صح ولا بتعمل كده عشان توصلي.
ابتلعت ريقها بارتباكٍ، وتساءلت:
_حوار إيه ده؟
أجابها وهو يركز مع كل حركة مرتبكة تصدر منها:
_وشها كله كدمات، بتقول إن زميلتها بالشغل هي اللي عملت فيها كده بسبب غيرتها منها.
