(أشباح المخابرات1)من الفصل السادس عشر الى العشرين

تحرر صوتها المبحوح وهي تجيبها:
_هكون فين يعني يا روز، كنت فوق.

تعجبت من صوتها، ووقفتها الغير متزنة، فأشارت لها على المقعد المقابل لها:
_طيب واقفة ليه اقعدي.

اعترضت على طلبها، وهتفت بانزعاج:
_خايفة هارون يلاقيني بره جناحي فيزيد من افعاله عشان يغيظ تيام، وأنا والله ما بطيق قربه.

شددت” رزان” على مطلبها بلطف:
_الاتنين بره، اقعدي محتاجه أتكلم معاكِ.

رضخت لها وأبعدت المقعد تجلس من فوقه باستسلامٍ، فبدت أكثر رؤية لمن تدقق النظر فيها:
_إيه ده عينك مالها؟؟

تدفقت دموع “رحيق” بألمٍ، جعلها تتمنى الموت حتى تحصل على الخلاص:
_تيام كسرني وهاني يا رزان، تصوري كان فاكرني رايحله أوضته بأمر من هارون، وبيلمح إني عاهـ**

ابتلعت باقي كلمتها وهي تنهار باكية، بشكلٍ جعل “رزان” تترك مقعدها وتجاور جلوسها حتى تمكنت من ضمها إليها، انهارت بين ذراعيها باكية بانكسار، والأخرى رغم الوجع الذي يستحوذ على قلبها تشدد عليها وتحاول بضعف التخفيف عنها:
_معلشي يا روح قلبي، هو بردو معذور يا رحيق، اللي حصله مكنش سهل، ودلوقتي هارون القذر بيكمل على اللي فاضل فيه.

وتابعت “روز” وهي تمرر يدها على خصلات شعرها وتطبطب بحنان عليها:
_متستسلميش يا رحيق، حاولي بأي شكل عشان تقوليله الحقيقة، حتى لو اختار ميكملش معاكِ بس على الأقل يعرف إن الوضع اللي انتي فيه مفروض عليكِ وغصب عنك.

أبعدت رأسها للخلف تطالعها بصدمة:
_أقوله إيه يعني، أقوله إني غلطت مع هارون قبل الجواز وبإرادتي، ده كده هيستحقرني أكتر يا روز.

أطبقت “رزان” على شفتيها بغضب وكرهها لأخيها يزداد يومًا عن يوم، واذا بها تقول:
_على فكرة اللي حصل ده فيه حاجه غلط، انك تكوني مع هارون بالتوقيت ده وراه شيء هو اللي خططه ليكِ عشان يعمل كده في تيام.

هزت “رحيق” كتفيها ورددت بآنينٍ:
_حتى لو صح، النهاية إيه إنه حصل فعلًا، ومعاه فيديو أنا فيه معاه بارادتي، وطبعًا تيام عمره ما هيصدق غير اللي عينه هتشوفه.

واستطردت وهي تخفي وجهها بين كفيها:
_أنا تعبت يا روز، تعبت من كل حاجه ونفسي أرتاح.

مسدت على خصرها والدموع زحفت على وجهها هي الأخرى، هي الوحيدة التي تُقاسمها وجعها:
_مش عارفة أقولك إيه، أنا كمان خايفة من مصيري مع كِنان، خايفة يجي عليا الوقت اللي اتمنى أكون فيه أم، خايفة أكرهه وأشوفه أناني في يوم من الأيام.