(أشباح المخابرات1)من الفصل السادس عشر الى العشرين
بقلم أية محمد رفعت
سأله ومازال يتطلع له، بينما يأكل “ياسين” طعامه بثبات:
_ليه مكنتش بتكمل؟
ترك الكوب من يده وقال وهو يبتسم:
_يابني ما أنا حكيتلك قبل كده بردو، إني فنان دماغي رامية لحب الخيول والرسم، بس الحاجتين دول مستحيل يعني هيعيشوني، لا الفن هينفعني في تدبير احتياجات حياتي ولا حتى الاعتناء بالخيول، لاني سبق واشتغلت في اسطبل.
وأضاف وهو يشير للطبق من أمامه:
_ما تأكل، الأكل مش عاجبك ولا إيه؟
هز رأسه وبدأ يستكمل طعامه وهو يمدحه:
_بالعكس ده رائع.
واستطرد بجدية تامة:
_فكرت في كلامي؟
سحب منديلًا يزيح بقايا الطعام، بينما يردد بخبث:
_ادارة المطعم بتاعك تقصد؟
أومأ برأسه بتأكيد، فاستطرد “ياسين”:
_معنديش مانع، بس زي ما حكيتلك كده أنا مبكملش في شغلانه كتير، بس عشان خاطرك هحاول.
تبسم” تيام” في راحة انبعثت من حديثه:
_هتستمر بإذن الله، وهتحب المكان جدًا، ده غير انه مش هيكتفك عن هواياتك.
وأشار بيده على الشاطئ الذي يطل عليه المطعم:
_ده غير إن مكانك المفضل للرسم على بعد خطوات منك، هتلاقي إيه أفضل من كده؟
رفع حاجبيه بسخطٍ:
_فعلًا؟!
ضحك “تيام” بصوته كله، وشاركه الأخير، ثم أمسك على ضحكته وقال بجدية تامة:
_عمر امبارح قولت كلام مكنش ينفع أقوله، فياريت يفضل بينا وميخرجش أبدًا، ده مش لاني خايف على نفسي والله، ده من خوفي عليك، إنت متعرفش إجرامهم واصل لفين؟ اللي بيمر من قدام بابهم ولو بالصدفة بس حياته بتنتهي، وإنت بقيت غالي عليا أوي، أنا مش عايز أخسرك.
عاد يسحب كوب قهوته، يستكمله وهو يشير له:
_اعتبرني فقدت الذاكرة يا دكتور.
اتسعت بسمته وتنهد في راحة، ثم نصب عوده يجمع مفاتيحه وأغراضه:
_كده اتطمنت على المطعم، هسيبك تشوف شغلك، وهرجع القصر أطمن على تالا.
وودعه بإشارة من يده:
_سلام.
هز “ياسين” رأسه ببطءٍ، وعينيه الغامضة تموج بما زاحمها، وخاصة بعد أن تأكد أن كل شيء بدايته بين أصابع “عثمان التميمي” حتى وإن حاول خداع “قُدس”.
******
ألمٌ مُبرحٌ يضرب رأسها، ثُقل جاسم فوق أهدابها، صوت تأوهاتها يخترق أذنيها، جاهدت لفتح عينيها، فاهتزت الصورة من أمامها بشكلٍ أرغمها على اغلاقهما مجددًا، ثم حاولت فتحهما ببطء حتى تثبتت الصور المهتزة من حولها، وكان أول ما رأته ذاك الذي يراقبها برمادية عينيه الخبيثة.
