(أشباح المخابرات1)من الفصل السادس عشر الى العشرين
بقلم أية محمد رفعت
نهض “زين” يتصنع الجلوس على السراحة، وفي لحظة سرق المشط الخاص بها، وبينما يعتدل بوقفته انتبه لنظرات “مرين” النارية، التي درست كل حركة صغيرة فعلها منذ دخوله للغرفة، فإذا بها تهدر بتحذير:
_رجع اللي خدته بدل ما أقفلك عينك التانية.
تأفف “زين” بانزعاج وصاح:
_متندمنيش إني جيبتك معايا يا اشطا، اعقل كده وركز في تسريحة شعرك، سيبني أركز في الكلمتين اللي هقولهم للكوكيزاية بتاعتي، مش ناقصة فرهدة هي الله يكرمك.
ربعت يديها أمام صدرها بسخرية، والعنف يبرز بنبرتها:
_لا مهو إنت مش هتقول الكلمتين اللي بتحفظ فيهم دول، ويا ريت تحترم نفسك لحد على الأقل تكتب الكتاب.
غمز لها بمشاكسة وقال:
_هكتب والله العظيم لأكتبه وفي القريب العاجل، عشان أكبت أنفاسك دي، ومش بعيد أبور شعرك ده بمكنة الحلاقة بتاعتي حلاوة كتب كتابي!
صاحت بعنفوان:
_إنت مصمم تتضرب تاني!!!
كاد أن يشتبك بلسانه معها، ولكنه انسحب عنها فور أن انفتح الباب وطلت منه “مارال” تهتف بعدم تصديق:
_مـــــــــــــرين!!!
انتبهت لشقيقتها تهرول صوبها باكية، فأسرعت إليها تتلقفها بأحضانها، وكلتاهما غارقتا بالبكاء من شدة اشتياق كلا منهما للاخرى، بينما يتابعهما “زين” بتأثرٍ ومحبة تجتاح شقيقته وحبيبته.
ربتت “مرين” على ظهر شقيقتها وتساءلت بنبرة باكية:
_عاملة إيه يا حبيبتي طمنيني عليكي؟
ابتعدت “مارال” عنها تطالعها بعتاب وهي تجفف دموعها:
_لسه فاكرة تسألي عني؟! أنا مزهقتش أسئلة عليكي لبابي ولزين، بس هو وفى بوعده وجابك ليا.
ومنحته نظرة ممتنة وقالت:
_ربنا يخليك ليا يا زين، إنت أسعدتني بجد.
أبعد “مرين” للخلف وصاح بهيامٍ:
_يا روح قلب زين، وحياة زين اللي متعلقة بين السما وبين الأرض، لا طايل جنتك ولا حتى مُكنة في أرضك!
لكزته “مرين” بغضب وصاحت:
_بتزقني كدا ليه، إبعد عايزة اتكلم مع أختي!
لف يده حول كتف “مرين” وقال:
_مش انتِ أختي بالرضاعة، يبقى هي كمان أختي، سيبني أخد راحتي بالكلام معاها، الحوار اللي عايزها فيه مهم وميحتملش أي تأخير يا مروان!
لوت شفتيها بتهكمٍ وصاحت بنفور:
_يا ريتها كانت هي اللي رضعت معاك كان زمانها لا تجوز ليك وخلصنا.
صرخ بوجوم وغضب:
_بعيد الشر عنها وعني يا بومة!!
كادت “مارال” أن تسقط من فرط الضحك، ورددت بصعوبة:
_إنتوا مفيش فايدة فيكم، مهما كبرتوا مش هتتغيروا أبدًا.
