(أشباح المخابرات1)من الفصل السادس عشر الى العشرين
بقلم أية محمد رفعت
ضحك بصوته الرجولي الجذاب، وبصعوبة قال:
_عنيا حاضر يا سيادة الرائد، أنا مُقصر جدًا أنا عارف!
احتقن وجهها غضبًا من حديثه ومدت معصمها له بضيق:
_قبل ما تنزل اتفضل وقف جهاز التعقب اللي زرعته في دراعي ده، أنا مش عيلة صغيرة عشان تراقبني في كل خطوة بخطيها.
انزعاجها، غيرتها القاتلة، غضبها، احمرار بشرتها من فرط حقدها على تلك الفتاة يجعله يتمنى أن تستسلم لمشاعرها وتعترف بحبها ولو لمرة واحدة، أفاق من شروده وتنحنح وهو يستعيد قوته أمام تلك المشاكسة:
_مش هينفع، سبق وقولتلك إن الجوكر والاسطورة حطوكي في عهدتي، فطول ما أنتِ بتقابلي الكلب ده الجهاز ده هيفضل في مكانه.
اقتربت المسافة الفاصلة بينهما ورددت بهدوءٍ خطير:
_وسيادتك شايفني ضعيفة مش هقدر أحمي نفسي منه!!
يعلم سبب انزعاجها منه الحقيقي، مثلما يعلم انها تتحجج لخلق مشاجرة معه، لذا ردد وعسليته تتجنب زُرقة عينيها الفتاكة:
_عمري ما شكيت في قوتك، بس ده زيادة حماية ليكِ.
صرخت بعنفوان ومازالت تتطلع له:
_والله!! ومعملتش كده ليه مع زين؟! ولا عشان هو راجل وقوي وقادر يحمي نفسه، لكن أنا الست الضعيفة المسكينة اللي دايما محتاجة لمساعدة سوبر هيرو الفريق.
أجابها برزانة وثبات لم يخسره بعد:
_ومين قالك إني معنديش جهاز تعقب لزين أو هو معهوش جهاز ليا، مرين احنا في مهمة أصعب مما تتخيلي، أي خطوة غلط وغير محسوبة هتدمرنا كلنا، احنا لسه بنلاعبهم على الهادي، اللي عدى كله لعب عيال واللي جاي هو اللي يتخاف منه.
وقبل أن تتحدث صاح:
_زين أول واحد دخل اللعبة بشكل رسمي عشان كده أنا وراه وبراقبه ولما بيحتاجني بظهرله، وإنتِ دخولك هيكون بعديه على طول فمن واجبي أمنلك نفس الحماية، ولما يجي دوري اكيد هعتمد عليكم .
وختم حديثه بقوة:
_كلنا بنكمل بعض، وبنساند بعض لحد ما نوصل للي احنا عايزينه، القادة كان سهل عليهم يتخلصوا من العيلة دي بسهولة، بس ده مش غرضهم ولا غرضنا، احنا غرضنا معروف نكشف اسرار العيلة دي ونكشف الناس اللي وراهم، فكلنا بنسعى لده.
اتشحت ببسمة اجرامية مرعبة، وهزت رأسها بمكر:
_كلامك موزون جدًا يا قائد، وفعلًا عندك حق.
ثم أشارت له ومازال يتعمق بها ليكتشف ما تود تلك المشاكسة فعله:
_خليك هنا بقى شوية، راجعالك حالًا.
وتركته وصعدت لغرفتها، ثم عادت بعد قليل تشير له بالصعود، رمش ياسين باستغراب، وصعد فقالت ببسمة واسعة:
_شمر كم قميصك لو سمحت.
