(أشباح المخابرات1)من الفصل السادس عشر الى العشرين
بقلم أية محمد رفعت
تنهد “نوح” بضيقٍ شديد وراح يهددها:
_اعقلي يا تالا وبطلي كلامك اللي يضايق ده، الامتحان بكره هتحتاجيلي وهكرفك.
رددت بدهشة:
_ها إيه؟
كبت ضحكته وأوضح لها:
_هطنشك يعني.
أتاه صوت ملاك موته يُزف له:
_ده أنا اللي هكرف لأمك ووقتي، بتتحرش بأختي!
جحظت عيني “نوح” صدمة، حينما رأى “تيام” قبالة عينيه، فجذب “تالا” يختبئ خلف ظهرها وهو يصيح بتلعثمٍ:
_تحرش إيه دي مراتي!!!
وكأنه كان يتوقع أن تهدئه تلك الكلمة، ولكنها أخرجت عنه غضبًا جعله يحاول الوصول إليه، والاخر يلف بزوجته من خلفها، فصاحت رعبًا عليه إن طالته يد أخيها:
_تيام أنت فاهم غلط صدقني.
منحها نظرة صارمة، وهدر ساخرًا:
_ليكِ دور جايلك يا غشاشة الامتحانات، بقى أنا بعد كل اللي بعمله معاكِ ده وتطلعي ناقشة الامتحان ومن مين من الواد ده؟!
حذره “نوح” وهو يصيح من خلفها:
_مسميش واد اسمي دكتور نوح التميمي!
ضربه من أعلى رأس “تالا” وهو يصيح باستهزاء:
_اخرس يالا، دورك جاي.
وعاد يجذب شقيقته بعنف:
_ثم إني مش منبه عليكي متتحركيش من اوضتك من غير علمي، نازلة تتسحبي وجايله هنا ليه؟؟
قالت وهي ترفع الكتاب الذي تحمله:
_وقف عليا مسألة واحدة والله، ونزلت عشان يفهمهاني.
ضيق عينيه ساخرًا:
_وهي المسألة دي اللي هتنجحك يعني!!
ردد “نوح” في محاولة للفكاك منه:
_متقلقش عليها يا تيمو، أنا معاها في اللجنة وهسربلها الامتحان كله، نجاحها من نجاحي أوعى تقلق!!
ترك “تيام” شقيقته وتمكن من جذب “نوح” عنها، وهو يتوعد له بغيظٍ:
_تعالالي هنا بره عشان نعرف نتفاهم.
وعند ذلك الحد وانتقل “كنان” من الاعلى للاسفل، واقترب منهم بصدره المكشوف، الذي أفصح لزوجته عما كان يحدث سابقًا، فاذا بها تبرق وهي تبحث عمن كان يجاورها منذ قليل، وعينيها تبرقان بصدمة وهي تراه قد أصبح لساحة المعركة.
سحب “كنان” أخاه من بين يدي “تيام”، وأشار له وإلى” تالا”، فأمسك يدها وهرول بها بعيدًا عنهما، وهو يهمس لها:
_بينا نهرب من هنا، هما تيران زي بعض وهيعرفوا يتفاهموا مع بعض!
وما أن تأكد “كِنان” من مغادرتهما حتى صاح:
_في أيه يا تيام؟ إنت بتتعامل مع نوح كأنه عدوك اللدود ليه، ما تركز يا حبيبي مع عدونا الحقيقي وتسيب عصافير الكناريا في حالهم!
تغضن جبينه غضبًا، انتقل لنبرته المتعصبة:
_أخوك كان بيتحرش بأختي وتقولي سايب عدوك اللدود.
