(أشباح المخابرات1)من الفصل السادس عشر الى العشرين
بقلم أية محمد رفعت
استدارت خلفها، رأته وهو يجفف العرق عن جبينه بالمنشفة، وعلى ما يبدو بأنه قضى وقتًا طويلًا بالتمرينات داخل الغرفة، تنهدت وهي تنطق بشرود:
_أنا كل ما بكتشف صعوبة فتح الملف، بتأكد إنه شايل عليه مصايب، بس عقلي مش متخيل إن في مصايب أبشع من اللي لاقناه يا ياسين!
رنا الجنرال منها، يجلس على المقعد قبالتها، وبصوته الرزين الهادئ قال:
_احنا جايين هنا وعارفين إننا هنشوف ونسمع اللي ميحتملوش عقل البشر يا مرين.
وأضاف وهو يعيد تنظيم الطاولة من أمامها:
_علي ليڤل الشر خصوصًا مع العيلة القذرة دي.
واستكمل وهالة الغموض تحاصر عينيه:
_ومهما وصلنا هيفضل نقطة في بحر عثمان التميمي!
عاد ببصره لها وهو يصرح عما يفكر فيه:
_قدس لوحدها مش كفايا إنها تلاعب شخص قذر زي ده، وقوعه مش سهل، ومهما كان قدس مُدربة بالنهاية اعتمادها الكلي كان على الطب.
قرأت ما بعينيه من غموض، فمالت على الطاولة، تلفت انتباهه عن تأمله للفراغ:
_قائد.
عاد ببصره لها، فتساءلت بمكر:
_بتفكر في إيه؟
سند ظهره للمقعد من خلفه وردد:
_وجودي مش هيقتصر على تيام وبس، أنا لازم أوصل لنقطة أخطر من كده وبأي تمن.
ضيقت زُرقتها بدهشةٍ، وهي تنطق بما استشفته من حديثه:
_عثمان؟
اتسعت ابتسامة ماكرة، وسحب زجاجة المياه يتجرعها مرة واحدة:
_اللعبة بدأت من بره وهتنتهي جوه، وبالأخص عنده.
زمت شفتيها بعدم رضا عما يفكر فيه:
_مش حاسة إنها هتنتهي بالبساطة دي، احنا بنحفر في حيطة مليانه أعمدة، كل ما هتكسر عمود هتلاقي وراه عمود تاني.
وأضافت ببسمة جذابة:
_الرحلة فعلًا طويلة أوي يا قائد.
راقبها بابتسامةٍ هادئة، زادت من وسامته التي لم يخسرها، وصوته الرجولي يردد:
_مهما كانت طويلة نفسنا طويل ومعاها للآخر، والمرادي حاسس إنك مهيئة بشكل كامل للنهاية وما بعدها، وخصوصًا لما الأمر بيتعلق عندك بكرامة الستات.
هزت رأسها بكل تأكيد، وأظهرت جانبها الاجرامي:
_الغل اللي عندي مش هيتمحي إلا برقبة روني.
عبث بعسليته بانزعاجٍ وغضب:
_برقبة مين؟
ضحكت بصوتٍ مسموع وقالت:
_هارون.
هز رأسه بينما يطبق على أصابعه البارزة بقوة من أسفل القفازات الرياضية المكشوفة، وفجأة ردد ببرود:
_طيب هقوم أخد شاور قبل ما أمشي، وإنتِ اعملي محاولة أخيرة لفتح ملفات سي روني، يمكن وقتها تتكيفي من قذارة خطيبك.
