(أشباح المخابرات1)من الفصل السادس عشر الى العشرين

وأضاف بمكر أستاذٍ يدرس عنه الخبث:
_طبيعي إنه يحطني في دماغه ويبعت ناس تراقبني عشان خايف على شغلكم المشبوه إنه يتكشف!

رنا إليه “تيام” يقف جوار اللوحة، يحاول القبض على عينيه التي تتهرب منه، بينما يردد بارتباكٍ:
_هقولك أكتر من كده إيه يا عمر، إنت كده هتستحقرني، عمر أنا مجبور أكون معاهم غصب عني صدقني.

وحينما لم يجد منه أي رد، وضع يده على كتفه وقال بتوترٍ:
_إنت الصديق الوحيد اللي سمحت له يدخل العالم بتاعي، طول عمري قافل على نفسي وماليش غير أختي، خوفت أخسرك.

واضاف وهو ينقل له ما نجح بصنعه:
_صحيح إحنا لسه متعرفين من فترة قليلة، بس إتعلقت بيك جدًا وبرتاح بالكلام معاك.

ترك “ياسين” الفرشاة عن يده ولف له بنظرات قابضة مسيطرة:
_وأنا مش قادر أستوعب انك ليك في القذارة دي يا تيام، معقول توصل بيك الحقارة إنك تساعد الكلب ده يخطف البنات ويدخلهم مواقع الـ.ـدرك ويـ.ـب، يبيعهم ويعمل عليهم مزاد عيني عينك كده، والله أعلم إنت لسه مخبي عني إيه!!!

تنهد بحزن شديد وكأنه يحمل أعباء العالم بأكمله فوق كتفيه، فردد بمرارةٍ مست حلقه قبل حديثه:
_عمر أنا ماليش علاقة بالمواقع دي ولا عندي أي معلومات عنها، أنا حاولت أخرج من بينهم بس معرفتش، مسابونيش في حالي لا أنا ولا أختي.

نهض “ياسين” يواجهه بذكائه:
_إنت عايش دور الملاك وإنت مش ملاك يا تيام، إنت اللي فتحت ليهم بوابة العبور للقذارة دي، إنت اللي بنفسك قايلي أنك اللي اخترعت العقار اللي سلبوا بيه عقول بنات كتيرة، ومش بس كده إنت طورت المخدارت لأنواع مريبة، والله اعلم عملت إيه تاني خلاك تسيبهم ويحاولوا يضغطوا عليك عشان ترجعلهم تاني.

نكس رأسه خزيًا منه، وردد بوجعٍ ملموس:
_مهما قولت ووجهتلي من اتهامات مش هدافع عن نفسي لإني مش بريء يا عمر، بس اللي لازم تعرفه إن الطريق ده اتفرض عليا من قبل حتى ولادتي، الطريق بدأه أبويا وعمي التوأم، ومشينا فيه أنا وعثمان وولاد عمي.

وأضاف وهو يطالعه بأعين غائرة:
_مهما حاولت أبعد بيرجعوني بالإجبار، انت فاكر إني مبسوط بالقذارة دي، أنا كنت مرعوب على أختي وعلى البنت الوحيدة اللي حبتها، حاولت أعيش نضيف بس هما متقبلوش ده خصوصًا بعد اللي وصلت ليه بالفترة الاخيرة قبل خروجي من القصر.

انتبه “ياسين” كليًا لتلميحه المخيف، فإذا به يتساءل بهدوء:
_إيه اللي وصلت ليه؟